Uit die hoof se pen – Me Tania Rademan

Laerskool Hekpoort is ‘n skool waar daar al vir meer as ‘n eeu lank gewoeker en gewerk word. By ons skool is ELKE dag ‘n OPE-DAG en enige persoon is welkom om ons enige tyd te besoek en te kyk hoe ons daagliks strewe om ons skool se leuse “Volhard en bou”  uit te leef om sodoende net die beste vir ons hele skoolgemeenskap te lewer.

Net soos die sonstrale op ons skoolwapen lig en standvastigheid simboliseer, vorm die vaslegging van goeie akademiese kennis en deelname aan sport- en kultuuraktiwiteite die grondslag by Laerskool Hekpoort.

Elke leerder word as uniek beskou en só gelei dat hulle hul potensiaal ten volle kan ontwikkel en bereik. As ‘n klein skool slaag ons daarin om ons kinders met selfvertroue die wêreld in te stuur.

Met ‘n geesdriftige, toegewyde en goed opgeleide personeelkorps, word leerders begelei en die pad aangewys om hulle voor te berei vir die hoërskool en op die lewe daarna.

Die reëls van ons skoollied vat alles mooi saam: “Karakter sterk en trou word hier vir ons land gebou- Hekpoort getrou aan jou wil ons volhard en bou”